成為媽媽一定意味著犧牲自我嗎？

我係一個22歲嘅年輕媽媽，因為意外懷孕，突然間變咗做媽媽同埋家庭主婦。呢個消息真係好震撼，我開始諗住我嘅夢想同埋目標係唔係要放喺一邊，而要優先考慮返我嘅新角色。我想知道做媽媽係咪意味住我要放棄自己嘅身份同埋渴望。
一開始我都用耐性同愛迎接咗媽媽嘅角色，珍惜住我bb。其實每一日都係一個學習嘅過程，有喜悅、疲憊同埋自我發現嘅時刻。例如發現自己可以學識煮飯、體會自己媽媽過往既辛苦、要變得有耐性、點陪bb玩。
不過喺無數個夜晚冇得訓同埋無止境嘅換尿片之間，我都忍唔住想要平衡返我嘅責任同埋我自己嘅獨特性。希望可以去返工，有能力搵錢，去約朋友去旅行等。
不過真係唔係一件容易既事，時間同錢都係好難平衡。當我出去返工/讀書，邊個幫我睇bb?屋企人既支持好緊要，但我又好怕時間耐咗，佢地都想有自己空間。湊孫同玩孫，始終唔一樣，點教都唔一樣。
好彩我老公好好，同我講，如果想返工都可以試下Part-time先，慢慢嚟，佢話明白我成日係屋企好悶。如果唔返工，都可以搵啲課程讀下，或者去下興趣班，俾人湊一兩個鐘。所以我都試緊有意識地安排時間比自己嘅興趣，學下整甲，亦會嘗試約朋友行下山，想有自己空間等。
當然，做媽媽係一份責任重大嘅工作，我要確保我BB得到最好嘅照顧同埋愛護。但係呢個唔代表我要完全捨棄自己嘅需要同埋慾望。我會試不斷尋找平衡，同時滿足我嘅家庭責任同埋自己嘅個人需要。