我同男朋友都拍咗差唔多兩年拖，一齊咗幾個月都開始有性行為。由一開始都講明，次次都要用套先可以做。因為大家都讀緊書，冇經濟能力，萬一有咗就gg啦。所以我次次都要有套先會做，唔想有意外。

總有時候，男朋友都會試下我底線，問我「可唔可以唔用套入幾下，之後會用返🥹」或者會係準備入之前就要求頭幾下唔用，因為佢覺得頭幾下未係好興奮，唔會有精子偷偷跑出嚟，應該最安全。

不過我每次都會解釋俾佢知，幾下都可能會有風險，學do姐話齋「意外即係意料之外」，我唔想有1%嘅意外。我亦會講我嘅擔憂俾佢知，令佢明白即使意外懷孕佢會負責，但身體始終係我，懷孕都係我，無論經歷生育定終止懷孕都係我。講白啲，我受嘅點都比佢多，唔係單單你會陪伴我一句，就可以等於承受同我一樣嘅經歷。
希望佢會理解我嘅諗法同擔憂，唔好因為一時嘅爽就忘記我嘅感受同可能面對嘅意外。

有一日，我岩岩完咗M兩三日，佢又再次問我「可唔可以今次唔用，試幾下呀🥺。」個樣都係可憐無辜樣，嗲下我，又好誠懇咁。佢都勁啦，見上網睇咗醫生講「完M頭1-3日，受孕機率係會較低」，所以佢再次提出。我真係無諗過佢會咁認真，上網搵資料說服我。個一下，我都有少少心軟，其實佢都提過唔少次，有時都係講笑咁帶過，有時說會嗲下，不過絕對唔會逼我，偷偷除套或者發脾氣等等。

有時我都會諗自己係咪太過緊張，唔考慮佢感受，唔包容佢，唔信任佢，會有自我懷疑等等。畢竟我都相信佢係一個可靠嘅人，亦相信有意外懷孕，佢會陪我面對。

有時同女仔朋友講起，佢哋都會話「男人係咁」，「邊個男人鐘意戴呀」，「有咗嗰個又唔係佢」。感覺我哋女仔都已經潛移默化接受「男性就係咁」。男性可能亦會「理想當然」覺得「男性就係唔用套」去說服另一半降低自己底線，去接受同包容佢，因為你愛佢。

呢啲無形嘅壓力，或者文化？我都唔知。可能係一個因素令到女仔有機會令自己降低底線，滿足對方，每個月都抱住僥倖，希望今次無中無事。

當然，我都照樣同男朋友講我嘅擔憂，同希望佢了解呢個決定唔單單保護我，亦係保護佢。我唔希望自己意外懷孕時，佢會自責，唔希望終止懷孕時，佢會內疚。我亦唔希望我哋嘅關係因為意外而有改變，而個意外明明可以避免。

我唔知道將來會唔會有一刻心軟，被說服，降低自己底線。而男朋友會唔會有一刻就發脾氣，頂唔順而走。但呢一刻我依然相信保護自己係無錯，如果佢因為咁而離開我，只可以講「呢一個人唔係真係咁愛我」。