點解女仔外表同身材經常受注視同批評？

好多時我都覺得自己嘅外表同身材受到好多注視同批評。無論喺學校、社交媒體定係街上，我經常感受到人地嘅目光同嘴巴。有時我都會諗，點解女仔嘅外表同身材咁重要？點解我哋要被人咁樣評價？

喺學校，有時朋友會開玩笑咁講一啲關於身材嘅話題。話人唔夠高、唔夠瘦、唔夠曲線好睇，樣靚又話無波，有前有後又話要蒙頭入閘，有時女仔批評嘅說話仲難聽。每次聽到呢啲評價，我都會審視自己身材，係咪同佢地批評嘅人一樣咁差。我開始懷疑自己，覺得自己嘅外貌唔夠吸引人，唔夠符合一啲社會嘅標準。

而上社交媒體，情況更加嚴重。我見到好多嘅相同埋完美身材，而自己嘅相比之下就顯得好普通同埋不夠好。我開始比較自己同其他人，對自己嘅外表感到不滿足。每次post相嘅時候，我都好擔心得唔到足夠嘅讚同埋正面評價。我覺得自己唔夠靚、唔夠迷人，而呢啲感覺好似一個無形嘅壓力，不斷地壓迫住我。

我開始問自己，點解女仔嘅外貌同身材咁重要？點解我哋要被人咁樣評價？儘管我知道每一個人都有唔同嘅外貌同身材，而呢啲特質唔應該定義我哋嘅價值同埋自尊心，但要對於成個社會嘅洪流都唔易。

接受自己，其實係一個過程，中間會出現對自己質疑，質疑人哋，討厭同改變自己，再慢慢學習發掘同欣賞自己嘅身材同外表，仲有內在同埋個性。過程中唔會好似變魔法或者一覺訓醒就覺得自己好靚，唔理世俗眼光，反而要用時間同經驗去建立一個自己都鐘意，同感到魅力嘅人。例如係學校present，我發覺自己唔怕public speaking，人哋都佩服我。呢啲評價反而仲開心，因為能力同才華係永久，而身材同外表可能要犧牲好多快樂先得到。

所以，我要提醒自己同埋其他女仔，唔好被外界嘅評價所左右。每個人都有自己嘅美，唔單止喺外表上，仲有個性同內在嘅價值。重要嘅係我哋接受自己，相信自己，同埋培養自己嘅自愛同自信。喺一個充滿批評同評價嘅社會度，我哋要學會堅持自己嘅價值觀同埋優點，俾自己一個堅強嘅心靈。

所以，如果有一日你覺得自己唔夠好，覺得受到批評同埋注視，請記住，你係獨特嘅，而你嘅價值唔單止喺外貌同身材。